Durita og Heidi avgjørdu eftir steðgin

Durita Hummeland og Heidi Sevdal vóru á blettinum fyri Føroyar, sum vunnu 2-0 á Moldova í Nations League.

Bæði málini komu eftir steðgin. Seinni hálvleikur var ikki meir enn byrjaður, tá Tórunn Joensen sendi eitt fríspark inn í brotsteigin, sum Durita Hummeland skallaði í netið.

Heidi Sevdal skeyt einasta málið í sigrinum á Gibraltar í februar, og metkvinnan kom eisini á máltalvuna undir tórsvallarsólini. Eitt korter var eftir at spæla, tá innskifta Eyðvør Klakstein fekk fatur á einum bólti, og sendingin inn um útiverjuna var frálík. Heidi Sevdal nýtti fyrstu nerting til at leggja bóltin til rættis, áðrenn hon sendi skotið lágt inn við nærru stongini.

Talan var um góðan dyst frá føroysku kvinnunum. Spælið sat munandi betri enn í februar, tá tær taptu ímóti Slovakia og vunnu tepurt á Gibraltar, og Føroyar hava nú 6 stig í bólki C1 og eru á 2. plássi aftanfyri Slovakia.

Týsdagin spæla Føroyar aftur. Tá vitjar Gibraltar, sum einki stig hevur fingið enn, á Tórsvølli.

Tórsvøllur (Nations League, 3. umfar)

Føroyar - Moldova, 2-0 (0-0)

1-0 Durita Hummeland, 47 min.
2-0 Heidi Sevdal, 75 min.