Eitt stig sendir Føroyar til EM

Hóskvøldið spæla Føroyar á útivølli móti Kosovo og EM-endaspælið í Kroatia, Noregi og Danmark er næstan tryggjað, eftir góðu avrikini móti Hollandi í mars.

Føroyar spældu javnleik móti Hollandi í fyrsta landsdystinum í stórhøllini við Tjarnir, og fýra dagar seinni vann føroyska landsliðið 32-31 móti Hollandi í Amsterdam.

EM-endaspælið er heilt tryggjað við javnleiki móti Kosovo.

Endaspælið kann gleppa av føroyskum hondum

Tað skal vilja illa til hjá føroyska landsliðnum, sleppur liðið ikki við til EM-endaspælið í januar 2025.

Í allarversta føri kunnu Føroyar enda á 4. plássið og sleppa sostatt ikki við til endaspælið.

Her eru tvey senario, har Føroyar enda nummar fýra í bólkinum:

Senario 1
Føroyar tapa við 11 ella fleiri málum móti Kosovo, og tapa móti Ukraina á heimavølli sunnudagin. Holland vinnur móti Kosovo ella Ukraina. Hendir tað, so hava Føroyar 5 stig, men Kosovo er betur innanhýsis og bæði Holland og Ukraina hava fleiri enn 5 stig.

Senario 2
Føroyar tapa móti Kosovo, og tapa móti Ukraina sunnudagin. Kosovo fær stig á útivølli móti Hollandi sunnudagin. Vera hesi úrslitini, so hava Føroyar 5 stig og øll hini liðini hava 6 stig ella fleiri.

Triðja plássið er mest sannlíkt nokk

Enda føroyingarnir á 3. plássið í bólkinum, er tað øgiliga sannlíkt at teir skulu til EM. 

Orsøkin er, at Føroyar hava trý innanhýsis stig í 3'ara roknskapinum, av tí at Føroya hava trý stig móti Hollandi. Men Holland kann tapa báðar dystirnar, og so er 3'ara roknskapurin rættiliga fløkjaligur, eru boðini úr Hondbóltssambandinum.