Misnøgdir amerikanskir granskarar skulu lokkast til Evropa

Í gjár skipaðu Ursula von der Leyen, ES-forseti, og Emmanuel Macron, forseti Fraklands, fyri einum fundi, sum hevði til endamáls at yvirtala - ella lokka - misnøgdar amerikanskar granskarar til Evropa at arbeiða.

Tað skrivar nrk.no. 

Fundurin kom í lag eftir at amerikanski forsetin gjørdi av at steðga ávísari gransking, og sum eisini gjørdi av at seta strong tiltøk í verk ímóti fleiri lærdum háskúlum.

ES-kommiserar, granskarar og granskingarráðharrar úr øllum limalondum vóru á fundinum, og tað sama vóru umboð fyri Noreg, Stórabretland og Sveits, sum annars ikki eru limir í ES.

Fyrstu granskararnir eru komnir

Tað fyrsta universitetið at fáa granskarar úr USA, var franska AMU-universitetið, ið heldur til í Aix-Marseille.

Í farna mánaði kunngjørdi universitetið, at tað hevði fingið umsókn frá 242 skikkaðum persónum til umleið 20 størv.

Norsku myndugleikarnir hava sett umleið 64 milliónir danskar krónur av til sama endamál. Og orsøkin er sambært stjóranum í norska granskingarráðnum, Mari Sundli Tveit, einføld. 

- Akademiska frælsið er undir trýstið, og tað verður skorið í fíggingini, sigur hon.