Nærkast teimum 55.000

Fólkatalið í Føroyum nærkast 55.000.

Tað var 54.845 1. apríl, 0,6 prosent meira enn 1. apríl í fjør.

311 fólk komu aftrat hetta árið.

Vøksturin er minni enn hann var frá 2023 til 2024, tá hann var 0,7 prosent.  

Tók dik á seg í 2014

Fólkavøksturin, sum tók dik á seg í 2014, náddi toppinum á sumri í 2019, tá fólkatalið vaks 1,8 prosent uppá eitt ár. 

Síðan tá er fólkavøksturin støðugt minkaður niður í ein triðing, skrivar Hagstovan.

Burðaravlopið og nettoflytingin fyltu á leið hvør sína helvt av vøkstrinum seinasta árið. 

Vøkstur og minking

Í kommununum vaks fólkatalið mest í Tórshavnar kommunu, Nes kommunu, Sjóvar komunu og Skálavíkar kommunu. 

Fólkatalið vaks serliga í Havn, á Strondum, á Toftum, á Argjum og í Skálavík. 

Aðrar bygdir við fólkavøkstri seinasta árið eru Saltangará, Hvannasund, Leirvík, Sørvágur, Streymnes og Klaksvík. 

Fólkatalið minkaði mest í Vágs kommunu, Tvøroyrar kommunu og Viðareiðis kommunu. 

Í teimum kommununum minkaði fólkatalið mest í Vági, Froðba og á Viðareiði.