Finalan í KAKUMiKS

Finalan í sjónvarpssendingini KAKUMiKS var fríggjakvøldið 16. mai. Spenningurin var í hásæti og kappingin hørð. Vinnararnir gjørdust Bjarti Karbech í Hjøllum og Mattias Malunarson Brøðraberg við liðnavninum Bakistjørnurnar. Teir vunnu ímóti Ró Thomassardóttir Thomsen og Brá Ebbadóttir Thomsen, ið gjørdust nr. 2. 

finalan_uppteljing_av_skulaatkvodunum.jpg

Í fyrra umfari fingu Bakistjørnurnar hjálp frá Onnu Rasmussen, ið eigur lítla bakaríið Baka fyri meg, og Køkukonurnar fingu hjálp frá Jórun Larsen, ið er útbúgvin kondittari og starvast hjá Miðberg bakaríi. Liðini skuldu baka 60 kransakøkubitar, sum tey borðreiddu fyri dómarunum og næmingunum í Skúlanum við Løgmannabreyt. Dómararnir góvu Køkukonunum 10 stig og Bakistjørnunum 9 stig fyri kransakøkubitarnar, og sostatt løgdu Køkukonurnar seg á odda. 

Men børnini í Skúlanum við Løgmannabreyt sluppu eisini at atkvøða, og her fingu Bakistjørnurnar flest stig. 

finalan_svand_og_skulaatkvodan.jpg

Endaliga avbjóðingin var at baka eina vinnarakøku við evninum “Vár”. Her fingu Bakistjørnurnar 10 stig, meðan Køkukonurnar fingu 8 stig. 

Samanlagt fingu Bjarti og Mattias 22 stig, og Ró og Brá endaðu við 19 stigum – og harvið vóru tað Bakistjørnurnar, ið vunnu!  

Vinningurin var ein glasmuffa at reypa sær við, ein full kurv av bakiútgerð og harafturat kann vinnarakakan smakkast hjá Kirstini og Olevinu heilt til 16. juni. 
 

finalan_vinnarakakan1.jpg

Hjartaliga tillukku, Bakistjørnurnar – og stóra tøkk til øll tey dugnaligu børnini, sum bakaðu við hjarta, hugflogi og nógvum sukri!  

Sí sendingina her.