Ávara ímóti at hækka gjøld hjá sjóvinnuni

48 gjøld, sum eru áløgd sjóvinnuni, hækka í miðal 127 prosent, sigur Reiðarafelagið fyri handilsskip, sum ávarar móti hækkingunum og eisini móti vantandi gjøgnumskygni.

Reiðarafelagið hevur latið landsstýrinum hoyringarsvar og tekur ikki undir við broytingunum. 

Í hoyringarsvarinum sigur felagið, at broytingarnar eru ikki bara um vanligar reguleringar, men um veruligar hækkingar og nýggj gjøld. 

Hetta skapar óvissu og økt trýst á vinnuna, sigur felagið.

Má samsvara við arbeiðsbyrðuna

Felagið minnir á, at eitt gjald, sum verður álagt fyri eina tænastu ella eitt eftirlit, eigur at samsvara við arbeiðsbyrðuna og kostnaðin, sum myndugleikin hevur. 

Fleiri gjøld, sum nú skulu hækka, tykjast tó ikki at fylgja hesi meginreglu, tí hækkingarnar eru so stórar.

Eitt dømi er gjaldið fyri skráseting í Føroysku altjóða skipaskránni.Tað hækkar millum 15.000 og 30.000 krónur, 25 prosent.

Reiðarafelagið fyri handilsskip heldur, at Uttanríkis- og Vinnumálaráðið eigur at greiða frá, hvørji sjónarmið og hvørjar grundgevingar eru grundarlag undir broytingunum.