Yvirtaka loftferðsluna í stigum

Føroyar yvirtaka nú ábyrgdina av málsøkinum loftferðsla.

Ein felags yvirlýsing um at yvirtaka málsøkið í stigum er gjørd.

Sirið Stenberg, landsstýriskvinna í uttanríkis- og vinnumálum, og Thomas Danielsen, flutningsmálaráðharri, hava skrivað undir yvirlýsingina.

Ábyrgdin fyri loftferðsluøkinum verður yvirtikin í stigum í samstarvi millum danskar myndugleikar og Føroya landsstýri, skrivar Uttanríkis- og vinnumálaráðið.

Loftferðsla er tøkniligt krevjandi øki, og tí hava landsstýrið og danska stjórnin avtalað, at yvirtøkan verður framd í stigum.

Loftferðsla, yvirtøka av loftferðsluni

Fyri fólkatingið í næstu tingsetu

Til tess at yvirtaka málsøkið í stigum krevst lógarbroyting, sum danski samferðslumálaráðharrin, Thomas Danielsen, ætlar at leggja fyri fólkatingið í næstu tingsetu. 

Aftrat hesum skal líknandi lógarbroyting gerast í Føroyum, eins og føroyskir og danskir myndugleikar í felag gera tíðarætlan fyri stigvísu yvirtøkuni.

Eisini verður settur arbeiðsbólkur við føroyskum og donskum umboðum, sum fylgja við yvirtøkugongdini og tryggja framdrátt, samskipan og neyðuga vitanarskiftið, skrivar Uttanríkis- og vinnumálaráðið.