Nýtt sambýli á Argjum til vaksin við autismu

Nú verður farið undir at byggja sambýlið við Rygsá á Argjum, sum er ætlað vaksnum við autismu. 

Landsverk biður nú um tilboð uppá lendis- og spreingiarbeiðið.

Tilboðini skulu vera inni í seinasta lagi 16. juni.

Tey vera eisini latin upp tann dagin.

Á Keypsportalinum stendur, at vinnarin verður kunngjørdur 19. juni. Har stendur tó ikki hvar, hann verður kunngjørdur.

Liðugt í 2027

Sambýlið við Rygsá á Argjum skal sambært tíðarætlanini vera liðugt seint í 2027.

Talan er um ein bústovn til 24 vaksin fólk, sum bera autismu.

Sambýlið er býtt í fýra búeindir, og einstøku eindirnar skulu ikki órógva hvørja aðra.