Klaksvíkar Hornorkestur fyri fullum útblástri

Tað var kongsvitjanin í juni í 1949, sum var orsøkin til, at Klaksvíkar Hornorkestur varð stovnað tann 5. mai í 1950, sigur Hanus Kjølbro, ið er ein av blásarunum í hornorkestrinum. Dannebrog kom fyrst á Havnina, har ið Havnar Hororkestur tók ímóti. Seinri fór Dannebrog til Klaksvíkar, har ið kongaskipið steðgaði á Pollinum, fyri at Thorshavn kundi leggja at fyrst, soleiðis at Havnar Hornorkestur kundi fara í land í Klaksvík, har ið orkestrið síðani tók ímóti Dannebrog og Fríðriki kongi. Hetta vildu norðoyingar ikki hava sitandi á sær, og tí varð Klaksvíkar Hornorkestur stovnað í 1950.

Í dag gongur tað sera væl hjá Klaksvíkar Hornorkestri, ið telur met nógvar tónleikarar, samstundis sum tilgongdin av ungum blásarum er í hæddini.

Ein sermerkt tekning av orkestrinum varð avdúkað í samband við 75 ára dagin

Nú Klaksvíkar Hornorkestur fylti 75 ár, var manningin tikin á bóli, tá Lív Kjølbro Skarðsá, ið er ein av ungu blásarunum og dóttur Hanus, vísti teimum eina tekning, ið hon hevði gjørt av øllum orkestrinum, og hvørs hugskot hon fekk fyri einum mánað síðani. Tá orkestrið sá tekningina á fyrsta sinni, bleiv ein øgiligur látur, sigur Hanus og leggur afturat, at øll kendu seg aftur í tekningini.

Tað var annars abbi Hanus, Poul Nolsøe Kjølbro, sum eisini er langabbi Lív, ið teknaði búmerkið hjá Klaksvíkar Hornorkestri fyri 75 árum síðani.

Tú kanst hoyra samrøðuna við Hanus Kjølbro, ið endar við at Klaksvíkar Hornorkestur spælur  brot úr Tìðin rennur sum streymur í á, sum orkestrið spældi í Varpinum fríggjakvøldið. Og tað var heimskendi dirigenturin, Alan Fernie, ið stjórnaði.