So er kappróðrarsendingin "Millum tøkini" flotað

Tað er altíð spennandi, tá ein nýggjur kappróðrarbátur verður flotaður.

Hvussu liggur hann í sjónum? Hvussu gongur hann? Flýtur hann yvirhøvur?

Soleiðis var kenslan eisini í Kringvarpinum í dag, tá nýggja kappróðrarsendingini "Millum tøkini" varð flotað fyri fyrstu ferð beinleiðis í Studio 3 í Sortudíki. 

Bundu um heilan fingur

Bundið var í ávísan mun heilan fingur, tí heitt var á hin kappróðrarkøna og hittinorðaða Ludvík við Stein um at seta seg aftur í rong og stýra sendingina. 

Og tað gjørdi Ludvík væl og virðiliga í mál, men manningin var eisini sterk og stinn.

Afturat sær hevði Ludvík tveir av tungvektarunum í føroyskum kappróðri, Saritu Kristinu Hansen og Magnus Norðberg, sum viðmerkjarar. 

Mikkjal Andriasarson, Millum tøkini

Mikkjal Andriasarson, ið er yngsti maður umborð á Havnarbátinum, var gestur í fyrstu útgávuni av kappróðrarsendingini "Millum tøkini" (Mynd: Bárður Lydersen)

Havnarbáturin og sumbingar

Høvuðsevnini í sendingini vóru óvæntaði sigurin hjá Havnarbátinum í 10. mannafarsróðrinum á Norðoyarstevnuni, og so tann gleðiliga sannroynd, at sumbingar aftur gera um seg í kappróðri. 

Gestur í útvarpsstovuni var Mikkjal Andriasarson, ið er yngsti maður umborð á Havnarbátinum, og so var eisini ringt suður til Sumbiar til Halltóru Joensen, forkvinnu í Sumbiar Ítróttarfelag. 

Næsta FM-stevnan verður Sundalagsstevna í Hvalvík leygardagin 14. juni. 

Næsta "Millum tøkini"-sendingin verður sosatt týsdagin 17. juni. 

Um tú ikki hoyrdi fyrstu "Millum tøkini"-sendingina, so kann hon hoyrast á KVF Ljóð. 

Hvat: Millum tøkini
Hvar: Í útvarpinum og á KVF Ljóð
Nær: Týsdagar kl. 15 eftir FM-róðrarnar í summar, og tá tað passar tær á KVF Ljóð