Hálvmaraton-teinurin var 800 metrar ov stuttur

Hann rann. Hann stríddist og vann.

Tá Neli Heldarskarð rann fyrstur um mállinjuna við ørmunum á lofti, legði hann til merkis, at tíðin var óvanliga góð - mestsum ov góð, og tað var ein orsøk til tað.

Tí ikki alt ruggaði rætt, tá Tórshavn Marathon skipaði fyri stórari kapping sunnudagin, har eisini fleiri útlendskir rennarar vóru við. Teinurin á hálvmaraton-kappingini var 800 metrar ov stuttur.

Bragdið skipar fyri Tórshavn Marathon, og Bragdið sigur, at orsøkin til feilin er ein menniskjaligur feilur.

- Tað vóru tvey vendimerkir á rutuni, og tíverri valdu okkara fólk, sum koyrdu alt út í ruskveðrinum, skeiva vendipunktið. Vit eru sjálvandi sera hørm um hetta, og vit fara at senda øllum luttakararnum teldupost, har vit greiða frá, hvussu keðiligt hetta var, sigur Bragdið í tíðindaskrivi.

Neli Heldarskarð vann við tíðini: 1:12:54.

Men hóast sigurin fekk eina lítla - ja, 800 metrar langa - skøvu í lakið, tá tað gjørdist greitt, at teinurin ikki heilt kom upp á teir offisiellu 21,1 kilometrarnar, so sigur Neli, at tað tekur tað einki frá gleðini at vinna kappingina.

Harvið ber til at siga, at Neli Heldarskarð ikki bara er vinnari av hálvmaraton-kappingini í Tórshavn Marathon - hann er eisini óformligi vinnarin í hálvmaraton-minus-800-metrar-kappingini.

Bragdið sigur, at Tórshavn Marathon er størsta og mest umfatandi tiltak hjá felagnum, og alt arbeiði er sjálvboðið og eingin fær eitt oyra afturfyri.

Tá Tórshavn Marathon er, eru um 100 vaktir, umframt onnur, sum hjálpa til við øðrum úti á rutuni, á málinum og aðrastaðni, so tilsamans eru eini 130 sjálvboðin við í tiltakinum.