Flogbóltur: greitt tap fyri Norðurmakedónia inni í Dal

Føroysku flogbóltskvinnurnar taptu greitt fyri Norðurmakedónia í fyrra dystinum í Silvurliguni inni í Dal á Sandi.

Føroyingarnir høvdu ætlað sær meira júst ímóti norðurmakedónum, men megnaðu ikki at taka av, tá møguleikin kom í 2. setti. Tí endaði dysturin 3-0.

Byrjanin á dystinum fekk næstan ikki verið verri. Gestirnir komu heilt upp á 21-7 og vunnu settið 25-11, áðrenn Føroyar vaknaði.

Tí tað gekk javnt á í 2. setti, og miðskeiðis var heimaliðið frammanfyri 12-10 og seinni 17-13. Gestirnir spældu seg kortini nærri, og yvirhálaðu seint í settinum, sum Norðurmakedónia vann 25-21.

Í 3. setti var eisini javnt eina løtu, áðrenn gestirnir settu ferð á og vunnu 25-16.

Leygardagin spæla Norðurmakedónia ímóti Eysturríki, áðrenn Føroyar skal royna seg ímóti Eysturríki sunnudagin klokkan 17.00.

Høllin Inni í Dal (Silvurligan, kvinnur)

Norðurmakedónia – Føroyar 3-0 (25-11, 25-21, 25-16)