Seðlarnir koma út á middegi

Seðlarnir í grindini, sum legði beinini í Leynum seinnapartin í gjár, koma út á middegi, bæði í Kvívík og Vestmanna, har hvalirnir eru merktir.

246 hvalir eru merktir ella tilsamans 1.887 skinn.

Drápsparturin verður hálvtannað skinn, og heimaparturin verður 0,1 skinn upp á fólkið í húsarhaldinum.   

Heimapartar verða latnir fólki í Norðurstreymoy, Vága sýslu, á vestursíðuni í Suðurstreymoy og til Hest og Koltur.

Kristian Martin Joensen, sýslumaður, sigur, at kommunurnar, sum hoyra til økið, fáa boð um at koma eftir sínum heimaparti, og tær kunna so á síni heimasíðu, hvar borgarar kunnu heinta grindina.