Sjórætturin kemur nú eisini á føroyskar hendur

Ólavsøkudag verður málsøkið sjórættur yvirtikið, og lóggávuvaldið, útinnandi valdið og fíggjarliga ábyrgdin verður tá á føroyskum hondum, upplýsir uttanríkis- og vinnumálaráðið.

Hetta er seinasti liður í arbeiðinum at yvirtaka alt tað, sum hoyrir sjóvinnuni til.

Í 2001 varð málsøkið trygd á sjónum yvirtikið, í 2011 loðslóggávan, í 2020 sjókortini, og í fjør vórðu økini sjóuppmerking og vitaverk yvirtikin.

Sirið Stenberg

Sirið Stenberg. (Mynd: Bjarni Árting Rubeksen)

Sirið Stenberg, landsstýriskvinna í uttanríkis- og vinnumálum, sigur, at tað er umráðandi, at vit hava fult ræðið á hesum málsøki.

- Vit hava víst í verki, at tað væl ber til at fyrisita hetta økið á ein hátt, ið hóskar til okkara samfelag og viðurskifti, og vit fara at leggja stóran dent á at hava eitt gott og dagført regluverk, sum lýkur altjóða krøv og treytir, sigur hon.

Yvirtøkan verður hátíðarhildin miðjan august í Sjóvinnustýrinum.