Meiri í mvg og skatti í ár

143 milliónir krónur meira eru komnar inn í mvg, tolli og punktgjøldum fyrstu seks mánaðirnar enn somu tíð í fjør

Tað vísa tøl hjá Taks.

Í ár eru eina milliard og 405 milliónir krónur komnar inn í mvg, tolli og punktgjøldum samanborið við eina milliard og 262 milliónir krónur somu tíð í fjør.

Størstu munirnir í inntøkuni hjá landskassanum á hesum øki vóru í mai og juni, tí inntøkurnar eru væl størroí ár enn tær vóru í fjør. Tað er kanska ikki so løgið, tí tað var júst í mai og juni í fjør, at verkfall var.
 

Skattainntøkurnar eisini hækkaðar

Hyggja vit so at skattainntøkunum, so eru eisini tær væl størri fyrstu sjey mánaðirnar í ár, enn tær vóru somu tíð í fjør.

Munurin er 218 milliónir krónur, sum eru komnar fleiri inn í ár enn í fjør.

Í ár eru inntøkurnar av landsskatti, kommunuskatti, kirkjuskatti og eftirlønarskatti tríggjar milliardir og 249 milliónir krónur. Sama tíðarskeið í fjør vóru samlaðu skattainntøkurnar tríggjar milliardir og 31 milliónir krónur.