Sóu fleiri televarpsrásir enn tey áttu

Í summar hava televarpskundar, sum hava Stórapakka, lagt til merkis, at nakrar rásir ikki longur eru at síggja.

Kundi, sum hevur Stórapakka hjá Televarpinum, hevur vent sær til Kringvarpið og sigur, at rásir sum Tv3sport, Tv3 Max og Eurosport ikki longur eru partar av pakkanum.

Á nýggjárinum var prísurin á øllum pakkum hjá Televarpinum broyttur.

Prísurin á Stórapakkanum hækkaði úr 686 krónum um mánaðin upp í 724 krónur um mánaðin. Tá fekk haldið Viaplay Sport News aftrat, stendur at lesa á heimasíðuni hjá Televarpinum.

Stavar frá januar 2024

Bogi Hammer er leiðari í Televarpinum, men hann vil ikki gera bandaða samrøðu við Kringvarpið.

Hann sigur, at henda broytingin stavar frá januar í 2024, tá millum annað Stóripakki misti rásirnar TV3 Sport, TV3Max, CNN, Eurosport, Animal Planet og Viasat Film- rásirnar, og at prísurin tá lækkaði úr 723 krónur um mánaðin niður 686 krónur um mánaðin.

Tann 1. januar í ár broytti Televarpið aftur prísin á teimum ymisku pakkunum, sum Televarpið sigur stava frá øktum rættindakostnaðum, vanligum prísbroytingum á marknaðinum og broytingum í pakkunum.

Brek á netinum

Orsøkin til, at kundar til í summar hava sæð rásir sum t.d. Tv3sport, Tv3 Max og Eurosport, hóast tær eru tiknar úr Stórpakka, er eitt brek á netrinum. 

Sostatt hava televarpshaldarar sæð fleiri rásir, enn tey eiga at hava í pakkanum. Brekið er nú rættað.

Televarpið sigur seg harmast um, at kundar kunnu hava ta fatan, at tey nú í summar hava mist nakrar rásir, men í veruleikanum hava kundar havt ein størri pakka, enn tey áttu at havt.