Oddvá heim við heiðursmerkjum og metum

Oddvá Sedea D. Nattestad svam seg til tvey silvurheiðursmerki og tvey evropeisk met til HM-svimjikapping í Bangkok, har hon hevur umboðað Parasport Føroyar.

Svimjarin úr Havnar Svimjifelag kappaðist í bólkinum II3, sum er fyri vælfungerandi fólk við autismu.

Oddvá Sedea D. Nattestad (2006), fekk yvirhøvur sera góð úrslit. Hon setti persónligt met í øllum teimum fimm kappingunum, sum hon kappaðist í, skrivar Parasport Føroyar.

Hon fekk silvur í 50 og 100 metur bringusvimjing. Tíðirnar upp á ávíkavist 37.61 sekund og 1.24.52 minuttir eru evropeisk met. 

Ein av størstu stjørnunum í kappingini, Kate Wallington úr Avstralia, setti heimsmet í øllum sínum kappingum og gjørdist besti kvinnuligi svimjari í allari kappingini.