Ellisheimið 90 ár

11. august 1935 varð Ellisheimið miðskeiðis í Havn vígt, og fýra dagar seinni fluttu fyrstu fólkini inn. Tá varð sagt, at heimið var líka vakurt sum endamálið við heiminum. Hóast heimið er farið um 90 ára aldur, er tað enn vakurt á at líta.

24 fólk búgva á Ellisheiminum. Gissur Joensen er ein teirra. Hann sigur, at hvør dagur hevur verið ein sólskinsdagur. Tað eru serliga menniskjuni sum skapa karmarnar og trivnaðin. "Einastandandi og fyrimyndarlig" eru rósandi orðini hann millum annað hevur um starvsfólkini á Ellisheiminum.

Hetta verður helst síðsti rundi føðingardagurin hjá Ellisheiminum, tí eftir ætlan verður alt virksemið flutt í røktarheimið á Stórubrekku í 2028. Búfólk og starvsfólk siga seg hava blandaðar kenslur við at flyta. Øll trívast væl í heiminum í miðbýnum, har tað er veðurgott og tætt við alt. Men teir fysisku karmarnir verða sjálvandi betri við øllum nýtímans hentleikum.

Øll eru hjartaliga vælkomin í føðingardag millum kl. 14-17.

Morgunsendingin vitjaði Ellisheimið. Innslagið kann hoyrast her: