KÍ og HB annað beinið í steypafinaluni

Nógv bendir á, at KÍ og HB bresta saman í steypafinaluni hjá kvinnum, sum verður á Tórsvølli 27. september.

Fyrru hálvfinalurnar vórðu spældar í gjár, og bæði KÍ og HB tryggjaðu sær gott útgangsstøði til seinnu hálvfinalurnar við tryggum sigrum á útivølli ímóti Skála og Víkingi.

KÍ vitjaði Skála undir Mýruhjalla, og við fleiri av bestu spælarunum á beinkinum vunnu klaksvíkingar 3-1. Birita Mohr, Karla Sjóstein og Maria V. Johansen skutu málini hjá útiliðnum, og Sara Benjaminsen skoraði málið hjá Skála.

Í Sarpugerði var málleyst í steðginum, men HB skoraði tríggjar ferðir í seinna hálvleiki. Silja Ragnarsdóttir Trier legði fyri, tá ein lítil tími var spældur, og síðstu løtuna øktu Fridrikka Clementsen og Lisa Haraldsen.

Seinnu hálvfinalurnar verða spældar 14. september.