Flottasti básur yvirhøvur

Handverkarafeløg, handverksmeistarafelag, fakfeløg og útbúgvingarstovnar eru millum tey, ið standa aftanfyri føroyska básin til Euroskills, og um man skal trúgva fyrireikarunum, so er hesin básurin eitt vælaverk, tí meira enn einaferð hava tey í básinum fingið at vita, at hetta er flottasti básur í sentrinum.

Og tað er kanska tað, sum skal til, tá ein skal biðja lova sær at fáa limaskap, soleiðis at føroyingar eisini sleppa at kappast í Euroskills, sum er kapping fyri handverkslærlingar. Vit hava í Føroyum FM, men kunnu sagtans kappast við onnur, heldur Marius Thomassen, sum samskipar føroyska básin.

- Handverkslærlingar eru eitt stolt fólkaslag, og man vil fegin vísa, at man er dugnaligur til sítt yrki, sigur Marius, og leggur afturat, at tað er tí, at ein innsatsur nú verður gjørdur fyri at fáa limaskap í Worldskills, sigur Marius. 

Føroyar hava søkt um limaskap, men síðan tá eru reglurnar broyttar, so at bert sjálvstøðug lond, sum eru limir í Europaráðnum kunnu gerast limir. Men av tí at umsóknin hjá Føroyum kom inn áðrenn broytingina, vónar Marius, at tað fer at eydnast hóast alt.

Kongen
Ein av teimum, sum er við til at gera føroyska básin so serstakan, er Livar Nysted, sum allar dagarnar hevur málað ein stóran málning við einum tíggjumannafari, sum er allur bakveggurin í básinum. Fólk hava so sæð, hvussu málningurin hevur tikið skap, men hann hevur ikki málað alt einsamallur. Kongur hevur hjálpt honum.

- Vit fingu frænir av, at kongur var í høllini og hildu, at tað hevði verið stuttligt um hann kom til básin hjá okkum. Eg helt, at eg mátti gera eitt pláss á málninginum, so hann kundi signera hann, so eg málaði eitt navnaskelti á bátin, og vónaði at kongur kom framvið, so hann kundi signera, sigur Livar.

Og kongur kom og játtaði at skriva navnið á bátinum, sum nú eitur Kongen.

Hvat Livar og kongur annars tosaðu um, vildi hann ikki siga nakað um, men málningurin kemur heim aftur til Føroya, og hann kemur upp at hanga eitt enn loyniligt stað.