Meiri ferðsla í Sandoyartunlinum - ferðsluveðhaldið minkar

Nú ferðslan í Sandoyartunlinum er nógv størri enn væntað, minkar veðhaldið hjá landinum.

Landið veðheldur fyri minstuferðslu í Eysturoyartunlinum og í Sandoyartunlinum.

Í fíggjarlógini fyri 2024 vóru 40 mió. kr.

Men við eykajáttanarlóg í september fór tað talið niður í 28,6 milliónir.

Í 2022 kostaði veðhaldið 54,1 milliónir og 47,2 milliónir í 2023. 

Stuðul til rakstur

Landið letur ferðslustuðul til partafelagið Eystur- og Sandoyartunlar. Játtanin í fjør var sjey milliónir krónur.

Stuðulin er til raksturin av tunlunum fyri at fáa prísin niður hjá teimum, sum brúka tunlarnar ofta. 

Einki krav er um, at stuðulin skal endurspegla, hvussu nógv avsláttarskipanirnar kosta.

Ein annar stuðul er rakstrarstuðul, í mesta lagi 10 mió. kr.

Hetta eru pengar, sum vera latnir, tí sjóvegis flutningur millum Streymoynna og Sandoynna er ikki longur útreiðsla í fíggjarlógini.