Føroyskur pool-spælari við til heimsmeistarakapping í Avstralia

Ein av yngstu ítróttargreinunum í landinum, pool, byrjar at gera vart við seg á altjóða pallinum.  

Poolsamband Føroya kunngerð í tíðindaskrivi, at felagið hevur ein luttakara við í stóru, altjóða poolkappingini WPA Champion Of Champions í Brisbane, Avstralia, har kappast verður í kinversku útgávuni av 8-Ball, Heyball. 

Tað er Eirik Mikkelsen, ið er hægst styrkismetti føroyski landsliðsleikarin, sum umboðar Føroyar á WPA Champion Of Champions-poolkappingin. 

Kappingin byrjar í dag, og spælt verður til og við sunnudagin, 21. september.

Umframt Eirik Mikkelsen, so er venjari hansara, Shehan Andrew Wanniya Bandara, eisini við á ferðini.

Altjóða dómarar

Umframt luttøkuna í WPA Champion Of Champions-poolkappingin, so vera tveir dómarar frá Poolsambandi Føroya við, tá European Championships Seniors Landis verður hildin í Assen í Niðurlondum frá 29. september til 9. oktober. Teir eru Tito César Quezada og Shehan Andrew Wanniya Bandara.  

Poolsamband Føroya skrivar í tíðindaskrivinum, at hetta bert er gjørligt, tí sambandið í januar skipaði fyri dómaraskeiði, har heili átta fingu prógv sum altjóða dómarar. 

Poolsamband Føroya

Føroyskir pool-dómarar (Mynd: Poolsamband Føroya)

Hetta er aðru ferð, at føroyskir dómarar fáa heiðurin at døma í einari stórari, evropiskari kapping. Fyrr í ár dømdi Shehan Andrew Wanniya Bandara til evropa meistaraheitini í Estlandi.

"Nú ein leikari er við til eina heimsmeistara kapping í Australia, og tveir dómarum eru ávegis til Niðurlond at døma, eru vit errin at umboða Føroyar á altjóða pallinum, og vit gleða okkum at vísa okkara ítróttarførleikar og -anda fram," skrivar Poolsamband Føroya í tíðindaskrivinum.