Løgreglan: Eingin ítøkilig ætlan um handfaring av illgrunasamum dronum

Dronur eru í hæddununum í hesum døgum.

Illgrunasom dronuflúgving ger um seg í grannalondunum.

Í Danmark, Noregi, Svøríki, Týsklandi, Hollandi, Póllandi, Rumenia og aðrastaðni í Evropa hava dronur seinastu dagarnir gjørt seg inn á loftrúmið.

Men hvussu eru Føroyar fyrireikaðar upp á óynskt dronuvirksemi?

Eingin møguleiki at skjóta óynsktar dronur niður við Vága Floghavn

Ólógligt er at flúgva við dronu við flogvøllin í Vágunum, uttan so loyvi er fingið til vega frá danska samferðslumálaráðnum.

Tað er komið fyri, at dronur hava flogið ólógliga við flogvøllin, váttar Regin I. Jakobsen, stjóri í Vága Floghavn.

Fyri kortum varð ein partur flogvøllurin stongdur, tí ein drona fleyg við Trælanípuna, sum verður flokkað sum ólógligt dronuøki uttan loyvi frá danska samferðslumálaráðnum.

Kortini er eingin skipan, sum varskógvar, er ein drona við flogvøllin. Sostatt má stjórin á Vága Floghavn líta á, at fólk boða frá, um ólóglig dronuflúgving er við økið.

Vága Floghavn hevur onga skipan, radaraskipan ella annað, sum sigur frá, so tað er ein spurningur um at hava eygu og oyru opin.

Regin I. Jakobsen, stjóri í Vága Floghavn

Heldur eingin møguleiki er at sleppa sær av við dronur, sum flúgva ólógliga við økið.

- At skjóta dronur niður, ella á annan hátt fáa dronur niður. Tað hava vit ikki heimild til, sigur hann.

Boð verða send eftir løgregluni, er ólógligt dronuvirksemi við flogvøllin.

Løgreglan fær javnan fráboðanir um dronur

Løgreglan hevur eingi hagtøl fyri fráboðanir um dronuvirksemi við flogvøllin í Vágum og í restini av landinum, men javnan fáa vit fráboðanir um dronur við flogvøllin, sigur Steen Nørskov, sjefpolitiinspektørur.

Løgreglan fær við jøvnum millumbili fráboðanir um ólógliga dronuflúgving.

Steen Nørskov, sjefpolitiinspektørur

Flogvøllurin er mitt í einum øki við nógvum ferðafólkum - bæði á ferð, men eisini í øðrum ørindum í náttúruni. Og í summar hava vit eisini fingið fráboðanir um dronuflúgving, sigur hann.

Men heldur ikki løgreglan hevur møguleika at skjóta dronurnar niður.

Bót einasta revsingin

Í fyrsta lagi skal løgreglan finna fram til, hvar dronan hevur flogið, og er dronan í ólógligum øki, fær dronuførarin eina bót, greiðir Steen Nørskov frá.

Eingin ítøkilig ætlan um handfaring av illgrunasamum dronum

Mannagongdin hjá løgregluni í Føroyum er júst tann sama, tá tað er illgrunasamt dronuvirksemi.

- Er talan illgrunasama dronu, royna vit á sama hátt at eyðmerkja dronuslagið, hvar dronan kemur frá, umframt at finna fram til dronuføraran, tá tað letur seg gera, sigur Steen Nørskov, sjefpolitiinspektørur.

Reglur fyri dronuflúgving í Føroyum

Dronukort

• Kort yvir økir, har dronuflúgving er ólóglig uttan loyvi frá danska samferðslumálaráðnum
• Dronureglur galdandi í Føroyum