Starvsfólkatalið farið upp um 30.000

505 fleiri fólk arbeiddu í Føroyum í september í ár enn í september í fjør, vísa tøl hjá Hagstovuni. 

Vøksturin er 1,7 prosent.

Tilsamans vóru 30.084 starvsfólk í september.

Menninir eru framvegis í meiriluta. Teir eru 15.300 og kvinnurnar eru 14.700 í tí, sum Hagstovan kallar starvsfólkaskarin.

43 prosent arbeiða hjá tí almenna, serliga kvinnurnar.

Tvær av trimum kvinnum arbeiða hjá tí almenna.

Í starvsfólkaskaranum eru fólk, 13 ár ella eldri, sum fáa A-skattaða løn svarandi til í minsta lagi fýra tímar um mánaðin.