Senatið samtykti at ógilda toll á Brasil

Í gjárkvøldið atkvøddi amerikanska senatið fyri einum lógaruppskoti, um at seta úr gildi tollin, sum amerikanski forsetin, Donald Trump, hevur lagt á Brasil.

Tað upplýsir tíðindastovan Reuters.

Trump legði í juli 50 prosent toll á vørur úr Brasil sum aftursvar til dómin móti fyrrverandi forsetanum í Brasil, Jair Bolsonaro. Fyrrverandi forsetin varð dømdur fyri at hava roynt at fremja hernaðarliga kollvelting í Brasil.

Republikanararnir hava meiriluta í senatinum. Sambært The Guardian atkvøddu 48 ímóti lógaruppskotinum, meðan 52 atkvøddu fyri. Tað vil siga, at fimm republikanarar atkvøddu saman við demokratunum fyri uppskotinum.

Steðgað í umboðsmannatinginum

Uppskotið skal víðari til umboðsmannatingið, har tað sambært The Guardian væntandi verður steðgað. 

Republikanararnir hava áður boðað frá, at teir fara ikki øvutan veg aftur við tollinum. 

Trump kann eisini nýta sýtingarættin, veto, ímóti lógini, so tað er lítið sannlíkt, at lógaruppskotið verður samtykt, og tollurin verður strikaður.

Trump hevur higartil ikki gjørt viðmerkingar til avgerðina.