Líggjas aftur danskur juniormeistari

Líggjas Joensen endurvann í gjár danska juniormeistaraheitið í 800 metur frí á svimjistevnu, sum er í Gladsaxe í hesum døgum, skrivar svimjing.com.

Svimjarin, sum hevur umboðað Aalborg Svømmeklub, síðan hann flutti til Danmarkar, vann sannførandi, tá ið hann í skjótasta riðli svam seg til tíðina 7:56.77 frammanfyri Mathias Hald (7:59.91) og Carl August Scheel (8:10.27).

Líggjas Joensen var frammanfyri við fimm sekundum, tá fyrstu 400 metrarnir vóru farnir afturum, men seinna helmingin minkaði munurin niður í trý sekund. Sigurin kom kortini ongantíð í vanda.

Besta tíð hjá Líggjasi Joensen í 800 frí er tilmeldingartíðin frá somu stevnu í fjør, sum var 7:55.67. Ta ferðina vann hann eisini kappingina. 

Føroyska metið í 800 metur frí eigur Pál Joensen. Hann svam 7:45.55 í Kina í 2011.