Ungur sandingur vann evropeiska kokkakapping

Í april næsta ár skal ungi sandingurin, Lassi Havsteinsson Klein, umboða Evropa í einari heimsumfatandi kapping fyri ungar kokkar, kallað Jeunes Talents Escoffier.

Síðst í oktober kappaðist hann í London, og í apríl skal hann til París at kappast ímóti átta øðrum kokkum frá restini av heiminum um heitið sum heimsins besti á sínum øki.

Talan er um eina klassiska kapping, og tí høvdu kokkarnir bara tær mest basalu rávørurnar, sigur Lassi Havsteinsson Klein, tá hann greiðir frá rættinum. Og rætturin var væl samansettur, tí tá dómararnir høvdu mett um uppgávuna, hevði hann vunnið kappingina.

Lassi Havsteinsson Klein er í kokkalæru á Søllerød Kro, sum er ein av teimum kendastu donsku matstovunum.

Ungi kokkasnillingurin av Sandi viðurkennir, at tað kann hava stóran týdning at vinna eina slíka kapping, kanska serliga nú lærutíðin nærkast endanum.

Trýst á leinkið og hoyr innslagið, sum var í tíðindunum klokkan 18.