Bert 16 prosent ynskja at lesa víðari í Føroyum

Á Markleysari Útbúgving í Norðurlandahúsinum í hesi vikuni gjørdi Hægri Nám á Glasi árligu kanningina millum miðnámsskúlanæmingar á seinasta ári, hvar tey ætla sær at lesa víðari.

Yvir 500 næmingar ganga á seinasta ári á miðnámi, og 236 svaraðu spurninginum: 

”Hvar ynskir tú at taka tína útbúgving?”

Einans 16 prosent av teimum spurdu søgdu Føroyar.

83 prosent ætlar sær av landinum

Hetta kunngerð Glasir í tíðindaskrivi á heimasíðuni.

Eitt prosent av teimum, sum svaraðu í árganginum, ætlar sær ikki nakra hægri útbúgving.

Men restin av teimum spurdu, 83 prosent, ætla sær av landinum, og nógv tey flestu, 68 prosent, til Danmarkar.

Tølini ongantíð verið verri

Til samanberingar svaraðu 40 prosent í 2017, at tey vildu lesa víðari í Føroyum og 36 prosent í Danmark

Tølini eru verri enn tey nakrantíð hava verið, ásannar Finn Jensen, dekanur á Hægri Námi á Glasi.

"Tølini eru so álvarsom, at vit áttu at kanna orsøkirnar nærri til, at øll ynskja at flyta av landinum og serliga til Danmark. Tað vísir seg, at øll ynskja at flyta uttan mun til, hvørja útbúgving tey vilja taka, og nær tey ætla at taka hana. Tað bendir á, at fólk meira hugsa um at sleppa burtur, enn hvat tey ætla sær at læra og nær."