Rýtmisk RIVA

Fyri tveimum árum síðani setti dansivirkið RIVA við Búa Rouch, Rannvá G. Niclasen og Vár B. Árting sær fyri at pallseta minst eina føroyska dansisýning um árið.

Endamálið var at gera dansilistina til ein størri og meira rótfestan part av føroyska listalandslagnum, og at tryggja umboðan av føroyskari samtíðardansilist á føroyskum pallum hvørt ár.

Nú eru tey aftur klár við einum nýggjum verki, ið nevnist "Rýtmugrafi", ið er eitt listarligt samstarv millum RIVA og Føroya Slagverks Ensemble. 

Føroya Slagverks Ensemble er mannað við Rúna Mouritsen, Ára Berghamar Danielsen, Helenu S. Lamhauge og Jan Rúna Poulsen.

Riva, Rýtmugrafi

Dansivirkið RIVA er mannað við Búa Rouch, Vár B. Árting og Rannvá G. Niclasen, meðan Føroya Slagverks Ensemble er mannað við Rúna Mouritsen, Ára Berghamar Danielsen, Jan Rúna Poulsen og Helenu S. Lamhauge (Mynd: Tróndur Dalsgarð)

Meira abstraktan leist

"Søguforteljing hevur verið miðdepilin í verkunum seinastu tvey árini, men hesuferð verður farið undir ein abstraktan leist, har granskað verður, hvussu rørsla og rýtma kunnu virka sum javnsettir listaligir miðlar á palli," skriva listafólkini í tíðindaskrivi. 

Ynskið við "Rýtmugrafi" hevur verið at skapa ein felags puls millum tónleikarar, dansarar og áskoðarar. Og nú frumframførslan nærkast, og verkið er næstan liðugt snikkað saman, merkist ein serlig nærvera og dýpd - ein kensla, ið bert kann skapast við livandi framførslum.

"Hesin pulsurin - ella rýtman - hon týðiligger kensluna av tíð og fyribrigdum, ið koma og fara í einum rensli. Vit merkja hana á egnum kroppi, men hava ofta ilt við at seta orð á hana. Rýtma er bæði
poetisk og rørandi; hon kann vekja sterkar kenslur og skapa eitt upphevjað sinnisrúm, har vit eina stokkuta løtu gloyma okkum sjálvi - um vit tora at sleppa takinum," greiða tey í RIVA frá. 

Riva, Rýtmugrafi

Mynd: Tróndur Dalsgarð

Málið er, at verkið fer at røkka einum breiðum áskoðaraskara bæði teimum, ið hava áhuga fyri klassiskum og eksperimenterandi tónleiki, og teimum, ið dáma dansi- og pallist.

Umframt limirnirar í RIVA og Føroya Slagverks Ensemble, so eru Maibritt Marjunardóttir, Villiam Soo Joensen og Bjørn Ulvedal Simonsen eisini knýtt at verkætlanini við ábyrgd fyri ávíkavíst búna-, ljós- og pallsniðgeving.

Frumframførslan av Rýtmugrafi verður í Norðurlandahúsinum leygarkvøldið tann 29. november kl. 19:30. 

Riva, Rýtmugrafi

Mynd: Tróndur Dalsgarð

Koreografi og dansiframførsla: Búi Rouch, Rannvá Guðrunardóttir Niclasen og Vár Bech Árting
Tónleikarar: Ári Berghamar Danielsen, Rúni K. Mouritsen, Jan Rúni Poulsen og Helena S. Lamhauge
Kompositión: Rúni K. Mouritsen
Ljóðmynd: Jan Rúni Poulsen
Búnar: Maibritt Marjunardóttir
Pallsmíð: Bjørn Ulvedal Simonsen
Ljós: Villiam Soo Joensen
Samskiparar: Rannvá Guðrunardóttir Niclasen, Vár Bech Árting og Ári Berghamar Danielsen
Lýsingarmyndir: Tróndur Dalsgarð