Dómarin kemur við niðurstøðu fríggjadagin

Eingin avgerð verður tikin í sakarmálinum, sum býráðslimir í Runavíkar kommunu hava reist móti Fíggjarmálaráðnum, fyrr enn fríggjadagin.

Málið er so mikið serstakt og prinsipielt, sigur dómarin, sum eftir dómsviðgerðina fyrrapartin bað um umhugsanartíð til fríggadagin at koma við niðurstøðu, um stevningin skal hava steðgandi virknað.

Fimm býráðslimir í Runavík, teirra millum borgarstjórin og varaborgarstjórin, hava stevnt Fíggjarmálaráðnum, sum nú umsitur kommunumál.

Málið var viðgjørt í rættinum fyrrapartin.

Býráðslimirnir vilja hava avgerðina hjá táverandi Løgmálaráðnum um at ógilda kommunuvalið og lýsa umval strikaða.

Í fyrstu atløgu skal Føroya rættur taka støðu til, um stevningin hevur steðgandi virknað.

Tað vil siga, at umvalið, sum er lýst at vera týsdagin í næstu viku, ikki verður hildið, fyrr enn málið er endaliga avgjørt hjá dómsvaldinum. 

Men niðurstøðan kemur ikki fyrr enn fríggjadagin.