Føroyar mistu tamarhaldið síðsta korterið

Føroyar taptu tepurt í fyrra venjingardystinum ímóti Italia við Tjarnir í fríggjakvøldið.

Heimaliðið byrjaði dystin væl, og av beinkinum sá skaddi Elias Ellefsen á Skipagøtu bakketuna við Óla Mittún á odda standa seg væl ímóti offensivu 3-3 verjuni hjá italiumonnum.

Í málinum stóð Pauli Jacoben væl, og Føroyar fóru til hálvleiks frammanfyri 19-17.

Eftir steðgin gekk eisini væl fyrsta korterið, og føroysku menninir vunnu sær eina leiðslu upp á seks eitt skifti, men síðsta korterið gekk illa.

Føroyingarnir høvdu verri við at spæla seg ígjøgnum verjuna, meðan Dominico Ebner brádliga fór at bjarga. Eitt sindur av fjáltri kom á, og nakrir tekniskir feilir sóust í álopsspælinum, sum annars hevði verið ruddiligt.

Síðstu minuttirnar fór Italia tískil framum og vann 36-34. Hetta er fyrsta tapið hjá hondbóltsmonnunum við Tjarnir, men longu sunnudagin hittast liðini aftur.

Tann dysturin byrjar klokkan 17, og Kringvarpið vísir hann í sjónvarpinum.