Føroysk handilsskip skulu gerast kappingarførari

Landsstýrið vil hjálpa føroyskum reiðaríum, sum hava handilsskip, at gerast kappingarførari.

Tað verður gjørt við at broyta ásetingina um time-charter, skipsleigu ávíst tíðarskeið, í tonsaskattalógini.

Reiðarafelagið fyri handilsskip hevur gjørt vart við, at ein avmarking í tonsaskattalógini um time-charter avmarkar part av vanliga virkseminum hjá føroyskum reiðaríum. 

Felagið hevur tí heitt á landsstýrisfólkið um at tillaga lógina og rætta skeivleikan, sum verandi orðing hevur við sær, so føroysk reiðarí gerast kappingarførari.

Og tað ger landsstýrisfólkið við at skjóta upp at hækka markið í avmarkingini úr tveimum upp í 18 mánaðir.

Samstundis verður time-charter ásetingin avmarkað til skip, sum vera strategiskt og handilsliga rikin úr Føroyum.

Hetta verður gjørt fyri ikki at leggja umsitingarligar byrðar á TAKS í sambandi við útlendsk reiðarí, sigur Fíggjarmálaráðið.