33 milliónir afturat til H-bygningin

Ein samd fíggjarnevnd tekur undir við at játta 32,8 milliónir krónur afturat til H-bygningin.

Pengarnir skulu brúkast til at gera ábøtur og umvælingar í H-bygninginum, sum lekur illa.

Sambært upplýsingum frá byggiharranum Landsverk er vavið av lekum stórt. Neyðugt er at umvæla ella skifta stóran part av klædninginum - sonevnda klimaskerminum - skifta vindeygu, skifta út hurðar, umframt annað arbeiði fyri at bygningurin gerst tættur. 

Eisini hava nógvu lekarnir havt við sær aðrar fylgiskaðar. 

Landsverk hevur upplýst fyri fíggjarnevndini, at tað hevur skund at fáa H-bygningin lidnan. Annars verða skaðarnir á bygningin - sum er spildurnýggjur og bara partvís tikin í nýgslu - enn størri.

Í álitinum frá fíggjarnevndini stendur eisini, at "um alt gongur eftir ætlan, so verður allur H-bygningurin tikin í nýtslu við árslok 2026."

Undir viðgerðini hevur fíggjarnevndin eisini fingið upplýst, at samlaði kostnaðurin fyri H-bygningin - við nýggjastu eykajáttanini - verður 834 milliónir krónur.