Serfrøðingar ikki vorðnir klókari av Mette-Marit

Í skjótt sjey vikur hava norðmenn bíðað eftir frágreiðing frá norsku krúnprinsessuni Mette-Marit um sambandið við Epstein.

Nú er hon loksins komin í 20 minuttir langari samrøðu við NRK, men sambært norska TV2, eru serfrøðingarnir ikki sannførdir.

Teir hava tosað við tríggjar kongaligar serfrøðingar og ein serfrøðing í politiskum gølum. Og niðurstøðan er, at fleiri spurningar standa ósvaraðir.

- Hon angrar einki, sum er hent í hesum málinum, og tað er eitt sindur undrunarvert, sigur politiski gøluserfrøðingurin, Kim Arne Hammerstad, og leggur afturat:

- Tá tað framvegis kennist, sum um ósvaraðir spurningar eru í málinum, kann tað meira enn so fara at raka hana. Eg haldi ikki, at Mette-Marit er sloppin enn.

Noyðist at svara fleiri spurningum 

Teir báðir kongaligu serfrøðingarnir, Carl-Erik Grimstad og Roger Øversveen, halda eisini, at Mette-Marit noyðist at svara einum hópi av spurningum:

- Eg gjørdist ikki nógv klókari. Eg síggi, at hon er ávirkað og hevur tað torført, men vit fáa ongar frágreiðingar, sigur Roger Øversveen.

Bæði hann og Carl-Erik Grimstad vilja hava svar uppá, hvør setti tey bæði í samband við hvørt annað. Hetta hevur Mette-Marit noktað at svara, tí hon heldur, at tað er privat.

- Eg eri ikki vísur í, at tað er privat, sigur Carl-Erik Grimstad við norska TV2.