Ósemjurnar vera viðgjørdar í dag

Samgongusamráðingarnar millum Fólkaflokkin, Sambandsflokkin og Javnaðarflokkin vórðu tiknar uppaftur í morgun klokkan hálgun ellivu í morgun í skrivstovubygninginum hjá løgtinginum.

Beinir Johannesen, samráðingarleiðari, er framvegis tættur sum tunnan, og vil ikki geva stórvegis innlit í, hvat hesir tríggir flokkarnir eru samdir um, ella hvar ósemjurnar eru. 

Hann sigur tó, at skattamál er eitt av tí, sum verður viðgjørt í dag, og at tað, sum flokkarnir eru ósamdir um, verður viðgjørt.

Tá ið hann verður spurdur um at seta fleiri orð á, hvar skógvurin trýstir, sigur hann:

- Noy!

Beinir Johannesen sigur, at nýskipanir eru ein partur av samráðingunum.  

Formaðurin í Fólkaflokkinum sigur seg vóna, at eitt útkast av samgonguskjalinum verður klárt í kvøld, ella í hvussu so er, at tá fer at líða væl, sigur hann.

Fram til 10. apríl

Beinir Johannesen hevur til fríggjadagin at skipa nýggja samgongu. Er hann ikki klárur tá, so má hann fáa nýggja heimild frá Bjørt Samuelsen, løgtingsforkvinnu.

Tríggir arbeiðsdagar eru í næstu viku fyri fríggjadagin.

Hoyr samrøðu við Beinir Johannesen í tíðindunum á døgurða