Mæla frá at flyta til Grindavíkar

Nevndin fyri Grindavík mælir barnafamiljum frá at flyta aftur til býin, fyrr enn tilbúgvingin í sambandi við eldgos, jarðskjálvtar og vatnflóð er klár.

Grindavík, sum liggur á Reykjanesi, fekk fyri tveimum árum síðani stóran skaða av eldgosi og jarðskjálvta.

Grindavíkar-nevndin legði í dag fram ætlan fyri, hvussu Grindavík kann endurreisast, og mælir til, at myndugleikar áseta vandaøki á Reykjanesi.

Eisini skal undirstøðukervi, - tvs. streymveiting, vatnveiting, kloakk og samskifti, gerast trygt, umframt nýggj vatngoymsla. 

- Grindavíkar kommuna skal ikki sjálv rinda fyri endurreisingina, - tað almenna eigur at rinda ein part eisini, sigur nevndin.

Mælt verður eisini til at skipa fyri tiltøkum og tænastum, sum kunnu styrkja og menna sosiala sambandið millum gríndavíksingar aftur, og at peningastovnar skulu vera sinnaðir at veita íbúgvunum lán til at keypa og umvæla ognir í býnum, skrivar íslendska kringvarpið.