Danska stjórnin vil hava sterkt samstarv

Samstarvið millum Danmark og Føroyar skal vera sterkt, tíðarhóskandi og á jøvnum føti.

Tað stendur í samgonguskjalinum hjá donsku stjórnini.

Danska stjórnin er millum annað sinnað kanna møguleikar at gera nýggjan sjókaðal, sum skal knýtast at føroyska teleundirstøðukervinum, umframt at kanna fígging til slíka verkætlan.

Um landsstýrið vil, er stjórnin sinnað at samráðast við landsstýrið um fígging til Suðuroyartunnilin, stendur í samgonguskjalinum.

Harafturat er stjórnin sinnað at millum annað arbeiða fyri føroyskum limaskapi í altjóða olympisku nevndini, IOC.

Stjórnin fer framhaldandi at stuðla sjálvstøðugum føroyskum limaskapi í heimshandilsfelagsskapinum, WTO, umframt at styrkja samstarvið millum Føroyar og ES.

Aðrir tættir í skjalinum snúgva seg millum annað um málslig krøv og góðkenning av heilsustarvsfólkum, sum arbeiða í Føroyum.

Eisini skulu serlig rættindi til føroysk lesandi, millum annað atgongd til orðabøkur, tryggjast.

Samgonguskjalið kann lesast her.