HM-lutakast: - Tú kanst fáa sveittan fram

Í dag verður greitt, hvørjum manslandsliðið í hondbólti skal spæla ímóti, til heimsmeistarakappingina í Týsklandi í januar.

Eisini fæst at vita, hvørjum býi Føroyar skal spæla bólkaspælið í, tá lutakast verður klokkan 17.

Góðu avrikini seinastu árini gera, at Føroyar eru í 2. styrkisbólki til lutakastið, og tað merkir, at Føroyar sleppur undan Slovenia, Norra, Serbia, Spania, Norðurmakedónia, Italia og Fraklandi.

Eisini er greitt, at Føroyar ikki endar í Stuttgart, tí longu frammanundan er avgjørt, at Italia og Frakland skulu spæla har. Tað merkir, at Føroyar spæla bólkaspæl annaðhvørt í München, Kiel ella Magdeburg. Eisini eru 10 lond plaseraði longu frammanundan.

Tú kanst fáa sveittan fram

Ingi Olsen heldur, at tað kann ganga bæði væl og illa ítróttaliga.

 - Tað er øgiliga spennandi. HM er ikki líka sum EM. Tú hevur nøkur lond, sum ikki eru úr Evropa, sum spæla øðrvísi, enn vit eru von við. Tá tú spælir ímóti evropeiskum liðum, líkist spælistílurin rættiliga nógv, men fert tú til Afrika ella Miðeystur, hevur tú ein heilt annan stíl, sigur Ingi Olsen.

Hann heldur, at tað hevði verið gott at sloppi undan t.d. Póllandi og Grikkalandi í styrkisbólki 3. 

Landsliðsvongurin Leivur Mortensen sigur við Portal.fo, at ynsklondini eru Týskland Kap Verde, Uruguei, meðan hann helst vil sleppa undan Danmark, Póllandi og Katar.

Lutakastið kann stroymast á youtube-síðuni hjá IHF.

Bólkarnir undan lutakastinum:

München
Bólkur A: Týskland
Bólkur C: Kroatia

Stuttgart
Bólkur B: Italia
Bólkur D: Frakland

Kiel
Bólkur E: Svøríki
Bólkur G: Danamark

Magdeburg
Bólkur F: Portugal
Bólkur H: Ísland
 

Styrkisbólkarnir til lutakastið

Styrkisbólkur 1: Egyptaland, Argentina (spæla eisini í Stuttgart í annaðhvørt bólki B ella D)
Styrkisbólkur 2: Slovenia, Noreg, Serbia, Spania, FØROYAR, Norðurmakedonia
Styrkisbólkur 3: Grikkaland, Pólland, Brasil, Bahrein, Tunesia, Kap Verde, Kina, USA
Styrkisbólkur 4: Katar, Kuveit, Japan, Algeria, Angola, Uruguei, Saudi Arabia, Turkaland