Verður varðhaldsfongslaður til 13. juli

Marius Borg Høiby verður varðhaldsfongslaður í Ila-fongslinum til 13. juli.

Tað sigur úrskurðurin frá landsrættinum í Oslo, eftir at Høiby bað um at sleppa leysur eftir dómin í gjár, og kærdi.

Í øðrum lagi bað Høiby um at fáa treytirnar fyri varðhaldinum broyttar, soleiðis at hann kundi sita heima í krúnprinsabústaðnum í Skaugum við fótfjøtri, men hesum vísti landsrætturin aftur.

Verjin hjá Høiby legði dent á, at Høiby vildi vera saman við sjúku mammu síni, Mette-Marit krúnprinsessu, og skjøl vóru løgd fram um, at sálarliga støðan hjá Høiby ikki er góð.

Kann fremja fleiri revsiverdar gerðir

Rætturin hevur lagt dent á, at Høiby nú er dømdur fýra ára fongsulsrevsing. Men framhaldandi varðhald eftir norskum reglum krevur eisini, at grundarlag er fyri fongsli, og at fongsul verður mett "neyðugt," og er "lutfalsligt."

Rætturin metir, at tað eru "sterk sannlíkindi" fyri, at Høiby fer at fremja nýggjar revsiverdar gerðir, um hann verður latin leysur,  at hann hóast vitjanarbannið, kann seta seg í samband við fyrrverandi unnustu sína, og ".. at støðan lættliga kann gerast álvarslig aftur..." til eisini fevna um harðskap.

Men rætturin sigur eisini, at tað hevði ikki verið "lutfalsligt" at hildið Høiby í varðhaldi, til kærumálið kemur fyri. Og at støða seinni kann takast til alternativ sum eitt nú fótfjøtur, sum forðar Høiby í at nærkast offrinum.