HPV-koppseting: Óvist um kunning er nóg mikið

Ov fá vera koppsett fyri HPV, og tað er als ikki nóg gott.

Tað sigur Eyðdis Hartmann Niclasen, landsstýriskvinna í heilsumálum.

Langt aftanfyri grannalondini

Sambært  Heilsustýrinum er undirtøkan fyri HPV-koppseting í Føroyum nógv lægri enn í grannalondunum, og minni enn helvtin av 15 ára gomlu gentunum eru liðugt koppsettar.

Tað er torført at svara, hví tað er soleiðis, sigur landsstýriskvinnan, sum sigur, at orsøkirnar kunnu vera ymiskar og ókendar. 

Men sambært henni er tað umráðandi at royna enn einaferð at gera vart við koppsetingina og fáa fleiri við.

Málið er, at 90 prosent av børnunum skulu vera koppsett, áðrenn tey fylla 15 ár. Hesum eru føroysku tølini langt frá.

Gongdin má broytast

Hesa gongdina vil Heilsustýrið broyta við nýggjum kunningartiltaki.

Men vísir hetta seg ikki at rigga - og liggja Føroyar framvegis langt undir málinum um 90 prosent koppseting - er landsstýriskvinnan sinnað at taka onnur stig enn kunning fyri at økja um undirtøkuna.  

Tí hetta er sambært landsstýriskvinnuni umráðandi at koma á mál við.

- Her er ein møguleiki fyri at koppseta ímóti krabbameini og undirlívskrabba, sum jú er deyðiligt. Tað mugu vit fáa á breddan, so vit koma upp á sama stig sum grannalondini.
 

Hoyr innslagið við Eyðdis Hartmann Niclasen, landstýriskvinnu í heilsumálum, niðanfyri: