Milliónatals kaffikoppar

Fólk, sum arbeiða hjá tí almenna, drukku yvir 16 milliónir koppar av kaffi í fjør.

Stovnar landsins keyptu næstan 12 tons av kaffi í fjør fyri 1,3 mió. kr. sigur Keypsportalurin, sum hevur talið frá Gjaldstovuni.

Nú skal rammusáttmáli gerast fyri at skipa innkeypið betur og fáa besta prísin.

Gjaldstovan biður um tilboð um rammusáttmála fyri kaffi til allar landsins stovnar.

Ætlanin er at gera fimm rammusáttmálar.

Stovnarnir, teir eru 80 í tali, kunnu so velja, hvønn tey brúka. 

Fyrsti sáttmálin er fyri kaffi, sum landsins stovnar keyptu mest í fjør. Tað var Merrild.

Karat var næst mesta keypta kaffi.

Triði sáttmálin er um bíligasta kaffi. 

Í fjórði sáttmálanum skal góðskan og smakkurin hava størsta týdning, men tó fyri ein rímiligan kostnað. 

Fimti sáttmálin er um kaffibønir.

Innlatingarfreistin er 28. august.

Gjaldstovan er farin at gera rammusáttmálar um innkeyp landsins.

Biðið verður nú eisini um tilboð upp á rammusáttmála fyri KT-útgerð, teldur, skrivstovulutir og dekk- oljuskift.