Fríkend fyri hvítvask

Føroya rættur fríkendi í dag eina kvinnu, sum var ákærd fyri hvítvask.

Kvinnan, sum er føroyingur, var í juni 2024 steðgað á flogvøllinum í Vágum. Hon var á veg til Danmarkar, og hon hevði umleið 107.000 krónur í okkara peningi, 47.000 krónur í føroyskum peningi og 8.000 evrur, uppi á sær.

Tær 8.000 evrurnar svara til umleið 60.000 krónur.

Lyfti ikki próvbyrðuna

Løgreglan helt, at pengarnir vóru eitt beinleiðis úrslit av ólógligum virksemi. Og kvinnan var eisini ákærd fyri, at peningurin stavaði frá minst einum, kanska fleiri, ólógligum tilburðum.

Kvinnan noktaði seg seka, og tá Føroya rættur fyrrapartin kom við síni niðurstøðu í málinum, segði rætturin, at ákæruvaldið hevði ikki prógvað síni krøv, pástandir, í málinum,  og tí var kvinnan fríkend.

Onga viðmerking

Kringvarpið hevur tosað við Katrina Thorsvig Hansen, ákæra, um málið, men hon sigur, at ákæruvaldið onga viðmerking hevur til dómin í løtuni.

Ákæruvaldið hevur júst fingið dómin, og fer nú brúka ta tíð, sum er neyðug, at taka støðu til, um farast skal víðari við málinum.