Dypping savnar fólk við psoriasis

Tað ger mun at dyppa, halda fleiri við húðsjúkuni psoriasis.  

Tí skipar psoriasisfelagið hvønn mánaða fyri dypping ymsa staðni í landinum. 

- Tað kann kennast flovisligt at hava sjúkuna, so hetta er eisini fyri at vísa á, at einki er galið við tí, sigur Anna Maria Venned, skrivari í Psoriasisfelagnum. 

Munur sæst á húðini

Áleið 15 damur vóru til staðar á sandinum í Fuglafirði fyri at vera við til at dyppa.

Ein av teimum er Lis úr Fuglafirði, sum letur væl at.

- Tær, sum ganga saman við mær oftani, halda, at húðin er blivin penar, so eg haldi, at tað hjálpir fyri psoriasis. 

dypping3.jpeg

Eingin vísindaligur samanhangur

Tá mann hevur psoriasis, er húðin ógvuliga turr, og tá gevur saltvatnið fukt aftur í húðina, sigur Anna Maria Venned.

Enn er tað tó ikki blivið kannað, um tað er ein vísindaligur samanhangur, sum vísir á, at dypping betrar um húsjúkuna. 

Tí er hetta hvørki nakað, mann í sjúkrahúsverkinum mælir til ella frá. Men um tað kennist væl, er tað bara at loypa útí, sigur Edith Vang, sjúkrarøktarfrøðingur á húðambolatoriinum á Landssjúkrahúsinum.  

Vilja røkka fleiri við sjúkuni

Í Føroyum eru tað áleið tvey prosent, sum hava psoriasis, av hesum eru áleið 80 limir í Psoriasisfelagnum. 

Tað eru tó fleiri, ið ikki eru limir í felagnum, ella ikki vita, at tey hava psoriasis. 

Tí roynir felagið at vísa seg runt í landinum og røkka so mongum sum gjørligt.

Hoyr innslagið niðanfyri: