Effo ákært fyri at bróta dátuverndarlógina

Fyri einum góðum mánaði síðan, 22. mai, bleiv Effo ákært fyri at bróta dátuverndarlógina.

Tað hevur danska løgmálaráðið fingið at vita frá ríkisadvokatinum.

Dátueftirlitið meldaði Effo 1. mai 2024 fyri brot á dátuverndarlógina. 

Sambært Dátueftirlitinum er brotið so álvarsligt, at Effo eigur at fáa 15 milliónir krónur í sekt.

Eirikur í Jákupsstovu

Lene Moyell Johansen, ríkisumboð, hevur nú svarað skrivligum fyrispurningi, sum Eirikur í Jákupsstovu, tingmaður, setti 6. mai um løgregluna og ákæruvaldið.

Ríkisumboðið sigur í svarinum, at óvist er, nær málið kemur fyri Føroya rætt.

Bakkafrost, Bakkafrost á Glyvrum

Bót til Bakkafrost

Løgtingsmaðurin spurdi eisini um nógv umrøddu bótina til Bakkafrost uppá 67 milliónir krónur.

Her svarar ríkisumboðið, at politiið fekk fleiri ymiskar fráboðanir frá Heilsufrøðiligu starvsstovuni yvir tvey ár.

Lene Moyell, Ríkisumboðið

Málið er gamalt, tað gongur heilt aftur til desember 2021. Tá varð Bakkafrost meldað fyri brot á flutningskunngerðina og lúsakunngerðina. Fútin ásetti bótina til 67 milliónir krónur. 

Men í vár segði fútin við útvarpið, at okkurt í málinum var fyrnað, og politiið slepti øðrum pørtum av ákæruni. Bótin fór tí at vera nógv minni enn 67 milliónir krónur. Men hvussu nógv, vildi fútin ikki siga. 

Hetta málið kemur eisini fyri í Føroya rætti 

TAKS, Taks

Samherji og Tindhólmur

Eirikur í Jákupsstovu spurdi eisini um feløgini við tilknýti til Samherja, sum TAKS meldaði í 2021.

Tað var millum annað um felagið Tindhólm.

Talan er um 17 milliónir krónur, sum Samherji rindaði Taks, tí Tindhólmur av órøttum skal hava fingið slakar 17 milliónir krónur í skattaafturbering fyri hýrur.

Afturberingin, sum sigst vera ólógig, verður kannað. 

Taks meldaði málið, men løgreglan er ikki liðug við tað enn.

Kannað verður, um Samherji brúkti Tindhólm til at gjalda fiskimonnum hjá Samherja í Namibia hýru, sum vóru teir sjómenn á farmaskipum.

Har er svarið frá ríkisumboðnum, at politiið fekk fráboðanina frá TAKS 13. april 2021 og kannar framvegis málið.

Les svarið her.