Starvsfólkatalið í Globe Tracker fer niður í helvt

Starvsfólkatalið í Globe Tracker fer niður í helvt.

Tað váttar Joel undir Leitinum, stjóri í Globe Tracker.

- Vit eru næstan 50 fólk, men í framtíðini vera nøkur og 20 fólk, sigur Joel undir Leitinum, sum tó ikki vil gera bandaða samrøðu. 

Globe Tracker hevur skrivstovur í sjey londum: Føroyum, Danmark, Íslandi, USA, Hollandi, Singapor og í Kina. 

- Tillagingar verða gjørdar í øllum støðum, sigur stjórin. Ætlanin er tó at hava skrivstovur í øllum hesum londum í framtíðini, sigur hann.

Hvussu nógv av teimum, sum fara úr starvi, arbeiða í Føroyum, vil stjórin tó ikki siga. Hann sigur tó, at øll, sum fara úr starvi, fara ikki beinanvegin, men nøkur arbeiða eina tíð aftrat.

Joel undir Leitinum

Arbeiða við fullari ferð

- Ymiskar verkætlanir eru lidnar, og tí er ikki tørvur á so nógvum fólkum í framtíðini, sum tað hevur verið. Fleiri av teimum avbjóðingum, vit hava havt, eru nú rættaðar. Vit hava nýggjar vørur, og vit arbeiða við fullari ferð víðari. Vit hava pengar at arbeiða við, og vit trúgva uppá tað, sigur Joel undir Leitinum.

Tryggingarfelagið Lív hevur tikið seg burturúr Globe Tracker. Felagið hevur mist 174 milliónir krónur við íløgunum í Globe Tracker.

Reiðaríið Framherji trýr tó framvegis upp á Globe Tracker, og hevur sett nýggjan pening í felagið. Hvussu nógvan pening, felagið hevur sett í, vilja hvørki stjórin ella nevndarformaðurin siga nakað um.