USA framt álop móti Iran

Aftur í nátt leyp USA á Iran. Tað hendi um midnáttarleitið og orsøkin var, at iranar høvdu lopið á kypriotiskt bingjuskip. Ein av manningini er ikki funnin aftur og eldur kom í skipið. Øll manningin er farin av skipinum, skrivar Danmarks Radio.

Iranar høvdu stutt frammanundan boðað frá, at ávaringarskot vóru latin av móti skipinum, sum sigldi á eini leið, sum iranar ikki høvdu góðkent.

Samstundis boðaði Kollveltingarhirðan frá, at Hormus-sundið var stongt fyri allari ferðslu, og at tað ikki letur uppaftur fyrr enn USA letur vera við at blanda seg í viðurskifti í økinum. 

Iranskir myndugleikar siga, at USA hevur lopið á fleiri mál í landinum. Talan skal vera um havnabýirnar Chabahar, Bandar Abbas og Sirik umframt oynna Queshm. Øll hesi mál liggja við Hormus-sundið. 

Amerikanarar siga, at lopið var á 140 mál, har millum annað dronur og rakettir verða framleiddar.

Iranar hava í sínum lagi svarað aftur við at leypa á Sameindu Arabisku Emiratini, Katar, Jordan, Bahrain og Kuwait. Tað er tó einki sum bendir á, at málini eru rakt. Iranar siga seg tó hava oyðilagt nakrar hangarar til dronur og kommandostøðir á eini hernaðarflogstøð í Jordan.