Compoundskjútti føroyameistari í recurve

Tá Hans Petur Højgaard fyri útvið hálvum ári síðan vann innandura-FM í recurve, kunngjørdi hann samstundis, at hann skifti til compound-bogan.

Síðan hevur recurve-bogin ligið órørdur, men kortini valdi veteranurin úr Ørvi at stilla upp til føroyameistarakappingina í recurve í Hoydølum um vikuskiftið, og handalagið var ikki versnað. Hans Petur Højgaard vann nevniliga kappingina, skrivar Bogaskjótisamband Føroya.

Hann skeyt nógv best í innleiðandi kappingini, og í finaluni vann hann 6-2 á Bárði Magnusson úr Vágskoti, sum hevði vunnið hálvfinaluna á Paula Mortensen úr Tambar, sum kappaðist um FM úti fyri fyrstu ferð.

FM-kappingin hjá recurve-monnunum varð framskundað eftir ynski frá skjúttunum. Hinir bólkarnir kappast um meistaraheitið 29. ella 30. august alt eftir, hvussu veðrið er.