300 børn og ung á bíðilista hjá psykiatriini

292 børn og ung eru á bíðilistanum hjá Barna-og ungdómspsykiatriini.

Og bíðitíðin er 24 mánaðir.

Men tey, sum krevja bráðfeingishjálp, sleppa framat alt fyri eitt.

Aðrar biðitíðir eru eisini langar.

Vaksin, sum bíða eftir ADHDútgreining, kunnu vænta at skula bíða í 36 mánaðir. 

Bíðitíðin til demensútgreining er seks mánaðir. 

811 vaksin eru á ADHDbíðilistanum, 54 eru á demenslistanum og 29 vaksin biða eftir ambulantari psykiatri.

Har er biðitíðin tveir mánaðir.

Eyðdis svarar Sirið

Tølini eru í svarinum hjá Eyðdis Hartmann Niclasen, landsstýriskvinnu, til Sirið Stenberg, løgtingskvinnu, sum spurdi um bíðitíðir.

Landsstýriskvinnan sigur, at arbeitt verður við átøkum fyri at stytta bíðitíðirnar.

Eitt er at flyta viðlíkahaldsviðgerð fyri ADHD og ADD úr Sjúkrahúsverkinum til kommunulæknar. 

Psykiatriski depilin hevur sett nýggjan serlækna nú í september.

Í løtuni eru seks serlæknar í psykiatriini hjá teimum vaksnu.  

Sambært serlæknaætlanini frá 2024 skulu setast 10 serlæknar í vaksnamannapsykiatriini.

Í Barna- og ungdómspsykiatriini er torført at fáa serlæknar í fast starv, sigur landsstýriskvinnan. 

Les svarið her.