Íslendska kringvarpið boykottar framvegis Eurovision

Íslendska kringvarpsstýrið heldur fram at boykotta Eurovision-sangkappingina.

Á fundi hjá stýrinum í RÚV í gjár kom fram, at stýrið vil ikki, at Ísland verður við í sangkappingini, uttan so at Ísrael verður útihýst frá kappingini.

Diljá Ámundadóttir Zoëga, sum situr í stýrinum, legði fundarfrágreiðingina út á sína Facebook-síðu í gjárkvøldið. Har sást, at seks av níggju stýrislimum vildu biðja kringvarpsstjóran boða fyriskiparanum, EBU, frá, at Ísland ikki vil taka lut í Eurovision Song Contest í 2027, uttan so at Ísrael verður útihýst frá kappingini.

Írland heldur ikki við

Írland boðaði herfyri frá, at tey heldur ikki vilja vera við í kappingini.

Írland var eitt av fimm londum, sum boykottaðu kappingina í fjør. Hini vóru Spania, Niðurlond, Slovenia og so Ísland.

Í eini roynd at ganga atfinningunum á møti, hevur EBU broytt kappingina eitt sindur. Til dømis skal tað nú aftur vera ein dómsnevnd, ella jury, í hálvfinalunum.

Almenna niðurlendska kringvarpið ætlar sær at vera við í ár, men stjórin í spanska kringvarpinum, RVTE, vil hava Spania at boykotta kappingina aftur í ár.

Eurovision-sangkappingin í ár verður í býnum Burgas í Bulgaria í døgunum frá 12. til 15. mai. Hetta er fyrstu ferð, at Bulgaria er vertur fyri kappingini.