Nýggja Akranes latið Smyril Line

Farmaskipið Akranes er í dag latið Smyril Line frá CIMC Raffles skipasmiðjuni í Yantai í Kina.

Akranes er tað seinna av teimum báðum nýggju Ro-Ro-farmaskipunum hjá Smyril Line. Skipið verður lastað í Kina í næstu viku og setir so kós móti Evropa.

Hitt nýggja skipið hjá Smyril Line, Skipanes, liggur framvegis í Hong Kong. Har hevur tað ligið, síðan tað kom eldur í maskinrúmið 2. september. Skipanes var tá júst farið av skipasmiðjuni við kós móti Føroyum, men noyddist so til Hong Kong til umvælingar.

Tær umvælingarnar verða væntandi lidnar síðst í november.

Skipanes og Akranes eru systirskip og koma bæði inn í verandi rutunet hjá Smyril Line.

Tilsamans er talan um eina íløgu hjá Smyril Line fyri meir enn eina milliard krónur.